सोलापूरी मसाला (काळा मसाला )७ ते ८ किलो Kala Masala ( Solapuri Masala) 7 to 8 kg

                                  काळा  मसाला (सोलापुरी  मसाला ) 

                                                          ७ ते ८ किलो 

                                                  साठवणीतला  मसाला

  तुम्हांला   सर्वप्रथम  दोन  वेगवेगळया   प्रकारच्या  मिरच्या  घ्यायला  लागतील ,त्यापुढील प्रमाणे   : -
                
     १.      तिखट  लाल  मिरची . (लवंगी  मिरची )
      
    २.       बेडगी  लाल  मिरची . 
                                                      
    प्रथम  या  दोन्ही  मिरच्या   निवडून  चांगल्या  स्वच्छ  करून   घ्याव्यात  आणि   नंतर  ४  ते  ५ दिवस  चांगल्या  उन्हात  सुकवाव्यात (वळवाव्यात )

        
साहित्य     : -

• ३ किलो  तिखट  लाल  मिरची 
• १किलो  बेडगी  मिरची 
• २किलो  खडा (अक्ख  ) मीठ 
• २किलो  कांदा 
• २५०० ग्रॅम  सुकलेले  खोबरे
• १० ग्रॅम  बदामफूल 
• १० ग्रॅम  सोंगडे 
• १० ग्रॅम  मिरे 
• १० ग्रॅम  लवंग 
• १० ग्रॅम  तिळ (पांढरे )
•  १० ग्रॅम   रामपत्री 
•  १० ग्रॅम   जावित्री 
• १० ग्रॅम  मोठी  विलायची 
• १० ग्रॅम  शहाजिरे 
• २० ग्रॅम  हिंग  खडा (अक्ख )
• १० ग्रॅम  दगडफूल 
• १० ग्रॅम  मेथी  दाणे 
• १०  ग्रॅम  नाकेश्वर 
• १०० ग्रॅम  मोहरी 
• ५ ग्रॅम  तेजपान 
• अर्धा  किलो  जिरे (  गोड  )
• २५० ग्रॅम  धने 
• १० ग्रॅम  त्रिफळ 
• १ किलो  खायचे  तेल ( रोजच्या  तुमच्या  वापरातील )  

कृती     : - 

• प्रथम  मिरच्या  वेगवेगळ्या  ४ ते  ५ दिवस  वाळवून  घ्याव्यात . नंतर  मिरच्याची  देठं  काढून  घ्यावीत . 
• मीठ  पण  मिरच्याप्रमाणे   ४ ते  ५ दिवस चांगले  वाळवावे .  जेणेकरून , त्यातील  ओलसर पणा  जाऊन  मीठ कोरडे होईल ( टीप  :  हे  करणे  गरजेचे  आहे  कारण  मीठ  जर तसेच टाकले तर  मिठात ओलसरपणा  तसाच राहतो  आणि  मसाल्यात  जातो  आणि  मसाला  लवकर खराब होतो
• नंतर  एक  कढई घ्यावी  ती  चांगली  गरम करून घ्यावी . नंतर  एक  -एक  करून  सर्व  गरम मसाला  [तीळ ,तेजपान ,धने ,शहाजिरे ,जिरे ,त्रिफळ ,नाकेश्वर ,दगडफूल ,मोहरी ,१० ग्रॅम हिंग  खडा ,मोठी विलायची ,जावित्री ,रामपात्री ,लवंग ,मिरे ,बदामफूल ,सोंगडे ,मेथी दाणे )मंद (बारीक ) आचेवर  भाजून  घ्यावा . 
•   नंतर  मीठ  देखील  मंद  आचेवर  भाजून  घ्यावेत .  नंतर सर्व गरम  मसाला  गार  करावे . 
• नंतर  कांडाप  मध्ये  जाऊन  मिरच्या ,  सर्व गरम मसाला , मीठ  कांडप  मधून दळून  आणावा . 
• त्यानंतर  एका  कढईत  तेल घ्यावे . तेल चांगले गरम करून  घ्यावे , त्यात कांदा  कापून  मंद आचेवर  लालसर तळून  घ्यावा .कांदा  थंड  करून  घ्यावा .)
• नंतर तळलेला  कांदा  मिक्सर मधून  किंवा  पाटावर  वाटून  घ्यावे (टीप  :  कृपया  पाणी   टाकूं  नये , गरज  वाटल्यास  कांदा  तळताना  वापरलेलं  तेल थोडं  टाकून  कांद्याचं  वाटण  करून   घ्यावे .)
•  नंतर  दळून आणलेल्या  मिरच्या, गरम  मसाला ,मीठ  मोठं  भांड  घेऊन   एकत्र  करून  करून  घ्यावे .  नंतर  त्यात  कांदयाचे   वाटण   घालून  चांगले  एकजीव  करून  घ्यावे . 
•  ७ ते ८ किलो  मसाला  तयार  होतो . 

साठवण  आणि  काळजी 

  : 
          
    १.    मसाला आणि  साठवण   करतांना  विशेषकरून  काळजी  घ्यावी  .   हात स्वछ धुवून  घ्यावे                    आणि महत्वाचे  म्हणजे  हात  कोरडे  करावे .  आणि  पाणी  मसाल्यात जाऊ  देऊ  नये  ,त्यामुळे             मसाला  लवकर  खराब  होतो .  

   २.  मसाला  साठवतांना  नेहमी  काचेची   बरणी  वापरावी . स्टील चे  भांड  वापरू नये , कारण                      मसाल्यात  हिंग   असल्यामुळे स्टील च्या   भांड्याला  छिद्र  पडते . 

  ३.    बरणी  स्वच्छ  धुवून  , उन्हात   चांगली  वाळून  घ्यावी  आणि  त्यात  मसाला  भरून  साठवून                  ठेवावा .